بەغدا.. فڕۆکەیەکی بێفڕۆکەوان لە نزیک هەواڵگریی عێراق دەکەوێتە خوارەوە

فڕۆکەیەکی بێفڕۆکەوان لە نزیک بارەگای دەزگای هەواڵگریی نیشتمانیی عێراق لە بەغدا، دەکەوێتە خوارەوە. ئەمڕۆ پێنجشەممە 23-12-2021، میدیا عێراقییەکان بڵاویان کردووەتەوە، فڕۆکە بێفڕۆکەوانەکە درەنگانی شەوی چوارشەممە 22-12-2021 لە ناوچەی مەنسووڕ لە رۆژئاوای بەغدا، کەوتووەتە خوارەوە. فڕۆکە بێفڕۆکەوانەکە لە دووریی 1.5 کیلۆمەتر لە بارەگای دەزگای هەواڵگریی نیشتمانیی عێراق کەوتووەتە خوارەوە. هەروەک میدیا عێراقییەکان باسی دەکەن، فڕۆکەکە کە بەهۆی هەڵەیەکی تەکنیکی کەوتووەتە خوارەوە، هیچ تەقەمەنییەکی پێوە نەلێکندراوە و بۆ چاودێریکردنی ناوچەکە هەڵدراوەتە ئاسمان.