لایەنە شیعە ناڕازییەکان هەڵوێستی خۆیان لەبارەی یەکەم کۆبوونەوەی پەرلەمان دیاری کرد

لایەنە شیعە ناڕازییەکان کە خۆیان لەناو چوارچێوەی هەماهەنگی (ئیتاڕ تەنسیقی) رێکخستووە، هەڵوێستی فەرمیی خۆیان لەبارەی یەکەم کۆبوونەوەی پەرلەمان دیاری کرد. رۆژی یەکشەممە 9-1-2022، پەرلەمانی عێراق لە یەکەم کۆبوونەوەی خولی پێنجەمیدا، محەمەد حەلبووسی، سەرۆکی هاوپەیمانیی تەقەددومی بە سەرۆکی پەرلەمان و حاکم زاملی و شاخەوان عەبدوڵڵاش بە جێگرانی سەرۆکی پەرلەمان، هەڵبژارد. شەوی سێشەممە 11-1-2022 لایەنەکانی چوارچێوەی هەماهەنگی لە نووسینگەی هومام حەمودی، سەرۆکی ئەنجوومەنی باڵای ئیسلامیی عێراق کۆبوونەوە و کۆبوونەوەکەش تا بەرەبەیانی ئەمڕۆ چوارشەممە درێژەی کێشا. دوای کۆبوونەوەکە، لایەنەکانی چوارچێوەی هەماهەنگی بەیاننامەیەکیان دەرکرد و تێیدا پێشهاتەکانی ناو یەکەم کۆبوونەوەی خولی پێنجەمی پەرلەمانی عێراقیان رەت کردەوە. ئەو لایەنانە رایانگەیاندووە: ناڕەزایی خۆیان لەبارەی پێشهاتەکانی ئەو کۆبوونەوەیە پێشکەشی دادگای باڵای فیدراڵی دەکەن. لە کۆبوونەوەکەدا، بەهۆی دروستبوونی ئاڵۆزی لە نێوان چوارچێوەی هەماهەنگی و رەوتی سەدر، مەحموود مەشهەدانی، سەرۆکی تەمەن لەهۆش خۆی چوو و کۆبوونەوەکە بە سەرۆکایەتیی خالید دەڕاجی، دووەم بە تەمەنترین ئەندامی خولی پێنجەمی پەرلەمان، تەواو کرا. دوای راگەیاندنی ئەنجامە بەراییەکانی هەڵبژاردنی پێشوەختەی پەرلەمانی عێراق کە لە رۆژی 10-10-2021 بەڕێوە چوو، هەموو لایەنە عەرەبییە شیعەکان (جگە لە رەوتی سەدر کە بە بەدەستهێنانی 73 کورسی بووەتە براوەی یەکەمی هەڵبژاردن)، خۆیان لە بەرەیەکدا بەناوی (ئیتاڕ تەنسیقی) رێکخست و ناڕەزایی خۆیان بە ئەنجامەکان راگەیاند و داوای هەڵوەشاندنەوەی ئەو ئەنجامانەیان کرد.