دره‌نگه ئێڤاریا ئه‌ڤرۆ یا رۆژا شه‌مبى، ل سه‌نته‌رێ قه‌زا ئاكرێ ژ ئه‌گه‌رێ رۆیدانه‌كا ئاگربه‌ربوونێ، خانیه‌ك ب ته‌مامى هاته سۆتن و كه‌سه‌كێ گیانێ خۆ ژ ده‌ستدا. مقه‌دم فیراس ئاكره‌ى، په‌یڤدارێ رێڤه‌به‌ریا به‌ره‌ڤانیا باژێرى ل ئاكرێ بۆ(باسنیوز) دیاركر: “دره‌نگه ئێڤاریا ئه‌ڤرۆ یا رۆژا شه‌مبى 5/1/2022 ل سه‌نته‌رێ باژێرێ ئاكرێ، د رۆیدانه‌كا نه‌چاڤه‌رێكرى دا، ئاگر به‌ردبیته خانیه‌كێ و دلگرانى ڤه، كه‌سه‌ك دبیته قۆربانى و گیانێ خۆ ژ ده‌ست دده‌تن”. په‌یڤدارێ رێڤه‌به‌ریا به‌ره‌ڤانیا باژێرى ل ئاكرێ ئاماژه ب وێ چه‌ندێ ژى دا: “ل ناڤ وێ مالێ دا چه‌ندین ساله ژلایێ كه‌سه‌كێ ڤه كه‌لۆپه‌لێن كه‌ڤن هاتینه كۆمكرن، وه‌ك ته‌خشت و كورسیك و چه‌ندین كه‌لۆپه‌لێن دیتر، هه‌رچه‌نده تا نۆكه نه‌هاتیه زانین ئه‌گه‌رێ درۆستبوونا ڤێ رۆیدانێ چیه،كاره‌ب یان سوپه و غاز بوویه، لێ ڤولینێ ژلایێ مه ڤه ده‌ستپێكریه”. دیار ژى كر:” د ڤێ رۆیدانێ دا كه‌سه‌كێ ب ناڤێ(ئه‌رشه‌د) كۆ دژیێ 50 سالیێ دا گیانێ خۆ ژده‌ستدایه و ئه‌و بخۆ كه‌سه‌كێ نه‌خۆش بوویه و گۆتژى: “برایه‌كێ وى كه‌سى دژیێ 60 سالیێ دا ژلایێ تیمێن مه ڤه هاتیه رزگاركرن و زێده‌بارى كۆ خانیێ وى هاتیه سۆتن، ژبه‌ر كۆ خانیه‌كێ كه‌ڤن بوویه، ژ ئه‌گه‌رێ بارینا بارانێ، خانیێ وى ژى هه‌رفتیه، ڤه‌كۆلینێ ده‌ستپێكریه تا كۆ ئه‌گه‌رێ درۆستبوونا وى ئاگرى بهێته زانین”.
ل ئاكرێ ئاگر به‌ربو ماله‌كێ و كه‌سه‌كێ گیانێ خۆ ژ ده‌ستدا
