ئه‌مڕۆ له سەڵاحەدین، سەرۆك مەسعود بارزانی پێشوازی لە باڵوێزی نوێی به‌ریتانیا لە عێراق كرد و هەنگاوەكانی ناو پڕۆسەی سیاسیی عێراق و تەحەددیات و ئاستەنگەكانی بەردەم پێكهێنانی حكوومەتی تازەی عێراق تاوتوێ كرا. ئه‌مڕۆ 5/6/2022، له سه‌ڵاحه‌دین سه‌رۆك بارزانی، پێشوازی له مارك برایسن ڕیچاردسۆن، باڵوێزی نوێی به‌ریتانیا له عێراق كرد و لە دیدارێكدا كە دێڤید هانت، كونسوڵی به‌ریتانیا لە هەولێر ئامادەی بوو، هەنگاوەكانی ناو پڕۆسەی سیاسیی عێراق و تەحەددیات و ئاستەنگەكانی بەردەم پێكهێنانی حكوومەتی تازەی عێراق تاوتوێ كرا. هەر لەو دیدارەدا ڕۆشنایی خرایە سەر بڕیارەكانی دادگەی فیدڕاڵیی عێراق و سەرۆك بارزانی جەختی لەوە كردەوە كە پابەندبوون بە دەستوور و گفتوگۆ چارەسەری گرفت و قەیرانەكانی عێراقە. پەیوەست بە بارودۆخی سیاسیی هەرێم و مافی پێكهاتەكانی هەرێمی كوردستان، سەرۆك بارزانی پابەندبوونی خۆی بەرامبەر پاراستنی مافی هەموو پێكهاتەكانی هەرێمی كوردستان دووپاتكردەوە. پەیوەندییەكانی نێوان هەرێمی كوردستان و به‌ریتانیا تەوەرێكی تری ئەو كۆبوونەوە بوو و باڵیۆزی به‌ریتانیا لە عێراق پابەندبوونی وڵاتەكەی بە ئەنجامەكانی سەردانی سەرۆكی حكوومەتی هەرێم بۆ به‌ریتانیا و پەرەپێدانی پەیوەندییەكانی نێوان هەردوولا دووپاتكردەوە.
سەرۆك بارزانی پێشوازی لە باڵوێزی به‌ریتانیا لە عێراق دەكات
