ئەردۆغان دەیەوێت رێككەوتنی ئەدەنا لەگەل سووریا زیندوو بكاتەوە

ئیدی ئاساییبوونەوەی پەیوەندی نێوان توركیا و سووریا، لە دەنگۆ چووە دەرەوە، بە تایبەت كاتێك رەجەب تەییب ئەردۆغان، سەركۆماری توركیا لە ئۆكراینا هاتەوە، لەناو فڕۆكە بەئاشكرا گوتی: ”كێشەی توركیا ئەوە نییە بەشار ئەسەد لە دەسەڵات دەمێنێت یان نا، به‌ڵكو دەبێت پەیوەندییەكانمان زیاتر بەرەو پێشەوە ببەین“، ئەردۆغان دەیەوێت بە سووریا بڵێت توركیا مەبەستییەتی رێككەوتنی ئەدەنا زیندوو بكاتەوە، ئەمەش لە بەرژەوەندی كورد نییە. رێككەوتنی ئەدەنا، لە ساڵی 1998، لە نێوان سووریا و توركیا ئیمزا كرا، یەكێك لە خاڵەكان ئەوە بوو، توركیا بۆی هەیە تا 5 كیلۆمەتر بچێتە ناو خاكی سووریا بۆ لێدان لە تیرۆرستان، بەڵام بەگوێرەی زانیارییەكانی رۆژنامەنووس (بانو گوڤەن)، ئەردۆغان دەیەوێت ئەو رێژەیە بۆ 35 كیلۆمەتر زیاد بكات لەو مەودایەشدا ناوچەی ئارام دروست بكات. توركیا بە بەهانەی رووبەرووبوونەوەی تیرۆر، سێ ئۆپەڕاسیۆنی گەورەی دژی یەكینەكانی پاراستنی گەل (یەپەگە) ئەنجامداوە، یەكەمیان (قەڵغانی فورات) دووەم (چڵە زەیتوون) و سێیەمیش (كانی ئاشتی) بوو، توانی لەو ئۆپەڕاسیۆنانەدا بەشێكی زۆری خاكی رۆژئاوای كوردستان داگیر بكات و بیخاته‌ ژێر ركێفی خۆیەوە. بانو پێیوایە، ئەردۆغان دەیەوێت لەگەڵ ئەسەد دابنیشێت و بڕوای پێبهێنێت كە رێگە بە توركیا بدات، ئۆپەڕاسیۆنێك بۆ بەیەك بەستنەوەی ئەو سێ ناوچەیە ئەنجام بدات، تاوەكوو بەیەكجار خەونی بوونی ستاتۆی كورد لە رۆژئاوا لەگۆڕ بنێت. دروستبوونی ناوچەیەكی ئارام لەسەر سنووری نێوان سووریا و توركیا، خەونی گەورەی ئەردۆغانە، پێشتر لەگەڵ وڵاتانی ئەورووپا و ئەمریكا هەوڵی زۆریدا ئەو ناوچەیە دروست بكرێت، بەڵام نەتوانرا ببێت بە راستی، بۆیە دەیەوێت بە نێوەنگیری ڤلادمیر پۆتین، سەرۆكی رووسیا ئەو خەونەی بهێنێتە دی. هەموو ئامانجی ئەردۆغان بۆ نزیكبوونەوە لە ئەسەد، لاوازكردنی ئیدارەی رۆژئاوای كوردستانە، تا لەورێگەیەوە رای گشتی توركیا بجوڵێنێت و بۆ هەڵبژاردنی داهاتووی توركیا دەنگی نەژادپەرستەكانی پێ كۆ بكاتەوە، بەڵام لەنگەرەكانی بەردەمی كەم نین، بەتایبەت فیلە گەورەكەی سووریا كە ئەمریكایە و بەئاشكرا بە توركیای گوتووە، ئەوان دژی ئەو ئۆپەڕاسیۆنەن و رێگەی پێنادەن، بەڵام ئەردۆغان وەكوو ئەوەی باسی دەكات، پەشیمان نەبوونەتەوە لەو ئۆپەڕاسیۆنە و لە كۆبوونەوەی سۆچیش لەگەڵ پۆتین باس كراوە و پۆتین پێی گوتووە، بڕۆ لەگەڵ ئەسەد دابنیشە و منیش دەبمە نێوەندگیر. ئێستا میدیاكانی جیهان و شرۆڤەكارانی سیاسی چاوەڕێی ئەوەن، چی بەروارێك خودی ئەردۆغان و ئەسەد لەگەڵ یەكتری دادەنیشن و بە یادی ساڵانی بەر لەشەڕی ناوەخۆی سووریا، باوەشی برایەتی بەیەكتریدا دەكەن.