چیرۆكی ژنە فڕۆكەوانێكی ئەو فڕۆكەیەی لە نیپاڵ كەوتە خوارەوە

ئەمڕۆ دووشەممە چیرۆكی ژیانی ئەو ژنە یاریدەرە فڕۆكەوانەی لە ڕووداوی كەوتنە خوارەوەی فڕۆكەكەی نیپاڵ گیانی لەدەست دا، بووە جێی سەرنجی میدیاكانی جیهان، بەتایبەتی كە ئاشكرا بوو بەر لە 17 ساڵ، مێردەكەشی لە ڕووداوێكی هاوشێوەدا گیانی لەدەست داوە. تۆڕی هەواڵی (سكای نیوز) بڵاوی كردەوە ئەنجۆ خاتیوادای تەمەن 44 ساڵ، یاریدەری فڕۆكەوانی ئەو فڕۆكەیەی كۆمپانیای فڕۆكەوانیی (ییتی) بوو، كە بە 72 سەرنشینەوە رۆژی یەكشەممە لە سنووری نیپاڵ كەوتە خوارەوە و تەرمی 68 سەرنشین دۆزرایەوە، بڕیار بوو دوای گەیشتنە شوێنی مەبەست، بۆ یەكەم جار لە ژیانیدا، بڕوانامەی فڕۆكەوانی پێبدرێت، لەبری ئەوەی چیتر وەك یاریدەری فڕۆكەوان خزمەت بكات. بەپێی میدیاكانی جیهان، خاتیوادا دوای ئەوەی مێردەكەی بەر لە 17 ساڵ لە رووداوێكی كەوتنە خوارەوەی فڕۆكەیەكی سەر بە هەمان كۆمپانیای ییتی، گیانی لەدەست دا، ئەمجارە خاتیواداش بە ڕووداوێكی هاوشێوەی هەمان كۆمپانیای فڕۆكەوانی گیانی لەدەست دا.