ل پارێزگه‌ها دهۆكێ د پێشانگه‌هه‌كا ده‌لیڤێن كاریدا 300 ده‌لیڤه دهێنه راگه‌هاندن. عه‌بدولكه‌ریم شێخ حه‌ماد، رێڤه‌به‌رێ رێڤه‌به‌ریا كار ل پارێزگه‌ها دهۆكێ د راگه‌هاندنه‌كێدا بۆ (باسنیوز) دیار كر: “سوبه‌هى رۆژا چارشه‌مبى 26/4/2023 پێشانگه‌هه‌كا ده‌لیڤێن كارى ل پارێزگه‌ها دهۆكێ دێ هێته ڤه‌كرن، ئه‌ڤ پێشانگه‌ها كارى، بۆ ئێكه‌م جار رێڤه‌به‌ریا كار ل دهۆكێ ب هه‌ماهه‌نگیا زانكۆیا دهۆكێ و رێكخراوا كار یا نیڤده‌وله‌تى دێ هێته ڤه‌كرن، ئه‌م ڤه‌كرنا ڤێ پێشانگه‌هێ ل ڤى ده‌مى ب گرنگ دبینین ژبه‌ر کوو دێ بیته رێكخۆشكه‌ره‌ك بۆ كێمكرنا رێژا بێكاریێ ل دهۆكێ”. گۆتژى: “50 كۆمپانى دێ پشكداریێ د ڤێ پێشانگه‌هێدا كه‌ن و 300 ده‌لیڤێن كارى یێن جودا جودا بۆ هه‌ردوو ره‌گه‌زان دێ هێنه پێشكێشكرن”. رێڤه‌به‌رێ رێڤه‌به‌ریا كار ل پارێزگه‌ها دهۆكێ دووپاتژى كر: “هه‌ر كه‌سه‌كێ مافێ هه‌یى سیڤیێ خۆ پێشكێشى وان كۆمپانیان بكه‌ت و ئه‌م بخۆ دێ بینه رێكخۆشكه‌ر بۆ وێ چه‌ندێ ده‌لیڤێن كارى بۆ گه‌نجێن مه بهێنه دابینكرن و گه‌نج ژ ڤێ پێشانگه‌هێ مفادار بن و ئه‌و كه‌سێ سوبه‌هى سیڤیێ خۆ پێشكێشى كۆمپانیان دكه‌ت، ماف هه‌یه سیڤیێ خۆ پێشكێشى زور كۆمپانیان بكه‌ت هه‌تا كوو ده‌لیڤه‌یا كارى بۆ په‌یدا ببیت، ئارمانجا مه ژى كێمكرنا رێژا بێكاریێیه و خزمه‌تكرنا وان كه‌سانه یێن كۆ دخازن ده‌لیڤێن كارى بۆ په‌یدا ببن”.
دهۆك.. 300 ده‌لیڤێن كارى دهێنه راگه‌هاندن
