ژ پێخەمەت پتر خزمەتکرنا خەلکێ دەڤەرا ئامێدیێ، پارێزگارێ دهۆکێ بریار دایە پارکەکا گشتى ل کۆمەلگەها قەدش ل ناحیا سەرسنکێ سەر ب قەزا ئامێدیێ ڤە بهێتە دروستکرن.
وارشین سەلمان، قایمقامێ قەزا ئامێدیێ بۆ (باسنیوز)دا دیار کرن: “د. عەلى تەتەر، پارێزگارێ دهۆکێ ل چەند رۆژێن بووریدا سەرەدانا قەزا ئامێدیێ کریە، دگەل تەخ و چین و خەلکێ جودا جودا رونشتیە و گۆهداریا گازندە و داخازیێن وان کریە و سۆز دایە داخازیێن وان لدیڤ شیانان بهێنە جەئینان و گۆتژى: “ژمارەکا پرۆژێن جودا جودا دێ ل ڤێ دەڤەرێ کەڤنە د خزمەتا خەلکێ دەڤەرێدا”.
قایمقامێ قەزا ئامێدیێ ئاماژە ب وێ چەندێ ژى دا: “ژ بۆ خزمەتکرنا زێدەتر یا خەلکێ کۆمەلگەها قەدش سەر ب ناحیا سەرسنکێ ل قەزا ئامێدیێ، بریار هاتیە دان پارکەکا گشتى و پر کەسکاتى بۆ خەلکێ کۆمەلگەها قەدش لسەر رووبەرێ نێزیکى چار هزار مەتران بهێتە دروستکرن، ب دروستبوونا وێ پارکێ دێ رێژا کەسکاتى ژى ل دەڤەرێ زێدە بیت و د هەمان دەمدا دێ خزمەتەکا زێدەتر و جوانتر بۆ خەلکێ سەرفەراز یێ ڤێ دەڤەرێ هێتە پێشکێشکرن”.